ବିଜେଡି ବିଜୁ ଯୋଜନା ଦଳ ହୋଇଛି: ନିରଞ୍ଜନ

ଭୁବନେଶ୍ୱର : ଚାଷକାମ ପାଇଁ ମୌସୁମୀ ବର୍ଷା ଉପରେ ନିର୍ଭରଶୀଳ ରାଜ୍ୟର ଚାଷୀ ସ୍ୱଳ୍ପବୃଷ୍ଟି ଯୋଗୁଁ ମରୁଡ଼ି ପରିସ୍ଥିତି ଉପୁଜି ଫସଲହାନି ଘଟିଲେ ଆତ୍ମହତ୍ୟା କରୁଛି। ରାଜ୍ୟର ଅନେକ ଚାଷୀ ଆତ୍ମହତ୍ୟା କରିଥିବା ବେଳେ ଆହୁରି ଅଧିକ ସଂଖ୍ୟକ ଚାଷୀ ଅନ୍ୟ ରାଜ୍ୟଗୁଡ଼ିକୁ ଯାଇ ଦୟନୀୟ ଭାବେ କାମ କରିବାକୁ ବାଧ୍ୟ ହେଉଛନ୍ତି। ଏଣୁ, ଜଳସେଚନ ବାବଦରେ ଖର୍ଚ ହେଉଥିବା କୋଟି କୋଟି ଯାଉଛି କୁଆଡ଼େ ବୋଲି ଓଡ଼ିଶା ପ୍ରଦେଶ କଂଗ୍ରେସ କମିଟି ସଭାପତି ନିରଞ୍ଜନ ପଟ୍ଟନାୟକ ପ୍ରଶ୍ନ କରିଛନ୍ତି। କେବଳ ଖର୍ଚ ନୁହେଁ, ବିଜୁ ଜନତା ଦଳ(ବିଜେଡି) ଲୋକଙ୍କ କଲ୍ୟାଣ ଚିନ୍ତା କରିବା ପରିବର୍ତେ ଯୋଜନା ପରେ ଯୋଜନାର ଭେଳିକି ଦେଖାଇ ବିଜୁ ଯୋଜନା ଦଳରେ ପରିଣତ ହୋଇଥିବା ସେ କଟାକ୍ଷ କରିଛନ୍ତି।

ପିସିସି ସଭାପତି ଶ୍ରୀ ପଟ୍ଟନାୟକ ଏକ ବିବୃତିରେ କହିଛନ୍ତି, ରାଜ୍ୟର ପ୍ରବାହିତ ନଦୀଗୁଡ଼ିକର ଜଳକୁ ସଠିକ୍‌ ବ୍ୟବହାର ହୋଇପାରୁନାହିଁ। ସବୁଠାରୁ ବଡ଼ ନଦୀ ମହାନଦୀର ଉପରମୁଣ୍ଡରେ ଛତିଶଗଡ଼ ସରକାର ବନ୍ଧ ବାନ୍ଧିବା ଫଳରେ ଓଡ଼ିଶାବାସୀଙ୍କ ପାଇଁ ଦୁର୍ଦିନ ମାଡ଼ିଆସୁଛି। ୨୦୧୫-୧୬ରେ ସ୍ୱଳ୍ପବୃଷ୍ଟି ଓ ମରୁଡ଼ି ପରିସ୍ଥିତି ଯୋଗୁଁ ବ୍ୟାପକ ଫସଲହାନି ହୋଇଥିଲା। ୨୭ଟି ଜିଲ୍ଲା ପ୍ରଭାବିତ ହୋଇଥିଲା। ଖରିଫ ଫସଲ ନଷ୍ଟ ହେବା କାରଣରୁ ସେହି ବର୍ଷ ବହୁସଂଖ୍ୟକ ଚାଷୀ ଋଣବୋଝ ପରିଶୋଧ କରିନପାରି ଆତ୍ମହତ୍ୟା କରିଥିଲେ। ସ୍ୱତନ୍ତ୍ର ରିଲିଫ କମିସନରଙ୍କ ରିପୋର୍ଟ ଅନୁଯାୟୀ ରାଜ୍ୟରେ ୪୧ଜଣ ଚାଷୀ ଆତ୍ମହତ୍ୟା କରିଥିଲେ।

Loading...
>