ଅଯୋଧ୍ୟା ରାୟ ଉପରେ ମୋଦିଙ୍କ ସମ୍ବୋଧନ : ନୂଆ ଭାରତରେ ଭୟ, କଟୁତା, ନକାରାତ୍ମକତାର ସ୍ଥାନ ନାହିଁ

ନୂଆଦିଲ୍ଲୀ / ଭୁବନେଶ୍ୱର : ଆଜି ସୁପ୍ରିମକୋର୍ଟ ଏକ ଏପରି ଗୁରୁତ୍ୱପୂର୍ଣ୍ଣ ମାମଲାରେ ରାୟ ଦେଇଛନ୍ତି, ଯାହା ପଛରେ ଶହ ଶହ ବର୍ଷର ଏକ ଇତିହାସ ରହିଛି । ସାରା ବିଶ୍ୱ ଏହା ଗ୍ରହଣ କରିଥାଏ ଯେ ଭାରତ ବିଶ୍ୱର ସବୁଠୁ ବଡ଼ ଗଣତାନ୍ତ୍ରିକ ଦେଶ କିନ୍ତୁ ଆଜି ବିଶ୍ୱ ଏହା ମଧ୍ୟ ଜାଣିଲା ଯେ ଭାରତର ଗଣତନ୍ତ୍ର କେତେ ଜୀବନ୍ତ ଏବଂ ମଜବୁତ । ଆଜି ରାୟ ପ୍ରକାଶ ପାଇବା ପରେ, ଯେପରି ଭାବେ ପ୍ରତ୍ୟେକ ସମ୍ପ୍ରଦାୟ,
ପ୍ରତ୍ୟେକ ଧର୍ମ ଏବଂ ସାରା ଦେଶର ଲୋକମାନେ, ଖୋଲା ହୃଦୟରେ ଏହାକୁ ସ୍ୱୀକାର କଲେ, ଏହା ଭାରତର ପୁରାତନ ସଂସ୍କୃତି, ପରମ୍ପରା ଏବଂ ସୌହାର୍ଦ୍ଦ୍ୟ ଭାବନାକୁ ପ୍ରତିଫଳିତ କରୁଛି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ସମ୍ବୋଧିତ କରି ପ୍ରକାଶ କରିଛନ୍ତି ।
ମୋଦି କହିଛନ୍ତି ଯେ ଭାରତର ନ୍ୟାୟପାଳିକା ଇତିହାସରେ ମଧ୍ୟ ଆଜିର ଏହି ଦିନ ଏକ ସ୍ୱର୍ଣ୍ଣିମ ଅଧ୍ୟାୟ ଭଳି । ଏହି ପ୍ରସଙ୍ଗରେ ଶୁଣାଣି ସମୟରେ ସୁପ୍ରିମକୋର୍ଟ ସମସ୍ତ ପକ୍ଷଙ୍କୁ ଶୁଣିଥିଲେ, ଅତ୍ୟନ୍ତ ଧୈର୍ଯ୍ୟର ସହ ଶୁଣିଥିଲେ ଏବଂ ସର୍ବସମ୍ମତିକ୍ରମେ ରାୟ ଦେଇଥିଲେ । ସେଥିପାଇଁ ଦେଶର ନ୍ୟାୟାଧୀଶ, ନ୍ୟାୟାଳୟ ଏବଂ ଆମର ନ୍ୟାୟିକ ବ୍ୟବସ୍ଥା ଅଭିନନ୍ଦନ ପାଇବାର ହକଦାର ।
୯ ନଭେମ୍ବର ହେଉଛି ସେହି ତାରିଖ, ଯେଉଁ ଦିନ ବର୍ଲିନ ପ୍ରାଚୀର ଧରାଶାୟୀ ହୋଇଥିଲା । ଦୁଇଟି ବିପରୀତ ବିଚାରର ଲୋକ ଏକଜୁଟ ହୋଇ ନୂତନ ସଂକଳ୍ପ ନେଲେ । ଆଜି ୯ ନଭେମ୍ବରରେ ହିଁ କରତାରପୁର ସାହିବ କରିଡର ଆରମ୍ଭ ହୋଇଛି । ଏଥିରେ ଭାରତର ସହଯୋଗ ରହିଛି, ପାକିସ୍ତାନର ମଧ୍ୟ । ଆଜି ଅଯୋଧ୍ୟା ମାମଲାରେ ରାୟ ସହିତ, ୯ ନଭେମ୍ବରର ଏହି ତାରିଖ ଆମକୁ ସାଥୀ ହୋଇ ଆଗକୁ ବଢ଼ିବା ଲାଗି ଶିକ୍ଷା ମଧ୍ୟ ଦେଉଛି । ଆଜି ଦିନର ବାର୍ତା ହେଉଛି ଯୋଡ଼ିବାର ଓ ଏକଜୁଟ ହେବାର ଏବଂ ମିଳିମିଶି ବଂଚିବାର । ଏହି ବିଷୟକୁ ନେଇ କେବେବି, କାହା ମନରେ କିଛି କଟୁ ଭାବନା ଥିଲେ, ଆଜି ତା’କୁ ଜଳାଞ୍ଜଳି ଦେବାର ଦିନ ।
ନୂଆ ଭାରତରେ ଭୟ, କଟୁତା, ନକାରାତ୍ମକତାର ସ୍ଥାନ ନାହିଁ ।
ସର୍ବୋଚ୍ଚ ନ୍ୟାୟାଳୟଙ୍କ ଆଜିର ରାୟ ଦେଶକୁ ଏହି ବାର୍ତା ମଧ୍ୟ ଦେଇଛି ଯେ କଠିନରୁ କଠିନ ମାମଲାର ସମାଧାନ ସମ୍ବିଧାନର ପରିଧି ମଧ୍ୟରେ ରହିଛି, ଆଇନର ପରିଧି ମଧ୍ୟରେ ରହିଛି । ଆମକୁ ଏହି ରାୟରୁ ଶିକ୍ଷା ଗ୍ରହଣ କରିବାକୁ ହେବ ଯେ କିଛି ସମୟ ବିଳମ୍ବ ହେଉ ପଛେ ଧୈର୍ଯ୍ୟ ରଖିବା ଆମ ସମସ୍ତଙ୍କ ପାଇଁ ସର୍ବୋଚିତ ।
ପ୍ରତ୍ୟେକ ପରିସ୍ଥିତିରେ ଭାରତର ସମ୍ବିଧାନ, ଭାରତର ନ୍ୟାୟିକ ପ୍ରକ୍ରିୟା ଉପରେ ଆମର ବିଶ୍ୱାସ ରହୁ, ଏହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଏହି ବିବାଦର ପ୍ରଭାବ ଅନେକ ପିଢ଼ି ଉପରେ ପଡ଼ିଥାଉ ପଛେ, କିନ୍ତୁ ଏହି ରାୟ ପରେ ଆମକୁ ସଂକଳ୍ପ ନେବାକୁ ହେବ ଯେ ଏବେ ନୂଆ ପିଢ଼ି, ନୂତନ ଭାବେ ନ୍ୟୁ ଇଣ୍ଡିଆର ନିର୍ମାଣରେ ନିୟୋଜିତ ହେବ ।
ଏବେ ସମାଜ ପାଇଁ ପ୍ରତ୍ୟେକ ଭାରତୀୟକୁ ନିଜ କର୍ତବ୍ୟ, ନିଜ ଦାୟିତ୍ୱକୁ ପ୍ରାଥମିକତା ଦେଇ କାମ କରିବାକୁ ହେବ । ଆମ ଭିତରେ ସୌହାର୍ଦ୍ଦ୍ୟ, ଆମ ଏକତା, ଆମ ଶାନ୍ତି, ଦେଶର ବିକାଶ ପାଇଁ ଗୁରୁତ୍ୱପୂର୍ଣ୍ଣ । ଆମକୁ ଭବିଷ୍ୟତ ଦିଗରେ ଦେଖିବାକୁ ହେବ, ଭବିଷ୍ୟତର ଭାରତ ପାଇଁ କାମ କରିବାକୁ ହେବ । ଭାରତ ସମ୍ମୁଖରେ, ଅନେକ ଆହ୍ୱାନ ରହିଛି । ଅନେକ ଲକ୍ଷ୍ୟ ଓ ଲକ୍ଷ୍ୟସ୍ଥଳୀ ମଧ୍ୟ ରହିଛି । ପ୍ରତ୍ୟେକ ଭାରତୀୟ, ସାଥୀ ହୋଇ ଆଗକୁ ବଢ଼ିବା ସହ ଏହି ଲକ୍ଷ୍ୟ ହାସଲ କରିବେ ଏବଂ ଲକ୍ଷ୍ୟସ୍ଥଳୀରେ ପହଁଚିବେ ବୋଲି ମୋଦି କହିଛନ୍ତି ।

Loading...
>